前两日整理图书，寻到一本五十年代出个《鲁迅全集》第6卷，正好翻着《弄堂生意古今谈》。先生讲辣拉三十年代初，闸北一带弄堂内外有“薏米杏仁莲心粥！”“玫瑰白糖伦教糕！”“虾肉馄饨面”！“五香茶叶蛋！”等等叫卖声。

其实，辣拉五十年代初我蛮小个辰光，常常听见叫卖声（到现在呒没忘记）正好也辣拉闸北（现在是静安区）。阿拉爷从小辣拉上海做工，不过一家门侪从老家浙江兰溪到上海来，是辣拉1953年春节以后。那年我虚岁十一，辣拉兰溪已经读好四年级。过好年到上海想转五年级。因为两个地方春季、秋季班个差别，教材又不一样，上海公立小学少，私校又读不起，我只好暂时休学在家。

不读书，当然没了小伙伴，我象一只孤单失群个小鸟，整天闷闷不乐，人也变得呆敦敦个。搿能介下去，我也勿晓得那能办！

当时阿拉一家门，住拉沿马路一幢简易两层木楼房个底楼，同幢楼还有好几份人家，讲闲语个口音侪勿一样个。日里厢，附近每家人家忙忙碌碌，做生活过日脚。夏天也没现在介热。一到夜里，煤油灯昏暗，但邪气安静。迭个辰光，从远处传来“栀子花啊~白兰花！”，声音清脆软糯，不过又拌了几分苍凉无奈，是一个带苏州口音个大姐姐的嗓音。声音由远而近，又慢慢交个走远。等一歇，又是一个男人个声音：“檀香橄榄嗅~买橄榄~”悠长，深邃，穿透了我个心肺！辣拉暑气散脱、万籁俱寂个夜头，天天侪听见这种邪气悠长好听又显得凄婉苍凉个叫卖声，让我想的老多老多个！

伊个辰光，刚解放三、四年，离开抗战胜利也不过七、八年，上海个经济还没恢复，全国各地又有大量人口嗡进上海，所以当时象闸北这种拨（让）日本人炸光过个地区，居住条件蹩脚，一般老百姓勤快、朴实、但是日脚侪过得不太好个。阿拉爷工资勿高个，养不起一家门六、七个人，我个大阿姐十八、九岁就嫁了人，阿哥十四、五岁开始打工，我下头还有二个弟弟、一个妹妹。我想想自家也半大不小了，应当晓得做人不容易，不好再胡里胡塗过日脚，我要对得起自家个爹爹、姆妈、阿姐、阿哥，还要带好阿弟阿妹。

我请阿哥帮我买来上海个小学语文、数学辣啥个课本，天天一个人读、写，还练毛笔字，做数学四则应用题，不懂个地方就问阿哥，问周围邻居当中个高小、初中生......人也重新开朗活泼了。第二年，我考进新成区（现在个静安区）个一所完小个五年级。

因为读书用功，肯帮助小朋友，大家选我做少先队中队长。又过了两年考进中学，当了班长和少先队大队主席，评上三好学生。

六十多年过去了，我个伲子早已成家立业，孙囡也早就参加少先队了。不过，我永远不会忘记当年闸北小辰光夜头个叫卖声，因为伊让我警醒、催我懂事体、逼我认真读书、奋发图强、热爱生活。搿能个我再会有今朝个好日脚！

潘庆云
2016年10月20日 第三稿

发布时间：2016/10/25

刘蔚铭法律语言学研究网
2002-05-06创建